TranscriptioLatin
[glossa ad «Maginetur etiam circulus…»] Clima sumitur dupliciter, scilicet astrologice et nigromantice. Astrologice, ut hic accipitur. Nigromantice, ut accipit Zoroastes, qui fuit primus magicae artis inventor, ubi ita dicit ad litteram: «Clima sunt etiam admiranda, quae cum carne mortuorum et humano sanguine fideliter dant responsa.» Iuxta quod debetis intelligere quod isti quatuor spiritus magnae virtutis, qui stant in cruciatis locis, scilicet in oriente, occidente, meridie et septentrione, quorum nomina sunt ista: Oriens, Amaymon, Paymon et Egim, qui spiritus sunt de maiori hierarchia, et habet unusquisque sub se XXV legiones spirituum. Unde ista propter nobilem ipsorum naturam appetunt sacrificia ex sanguine humanorum et carne similiter hominis mortui vel gatti[cati]. Sed ars ista Zoroastes non potest fieri sine magno periculo, ieiuniis et orationibus et omnibus quae sunt contra fidem nostram. Unde cum ponitur sanguis humanus in cocha aenea, tales facta invocatione veniunt; et hi spiritus vocantur climata, quia sicut clima est elevatio, sic hi spiritus sunt omnes superius elevati. Non fuerunt climata nisi septem, ratione septem planetarum, eo quod unusquisque planeta dominatur suo climati: nam Saturnus dominatur in primo, Iupiter in secundo, Mars in tertio, Sol in quarto, Venus in quinto, Mercurius in sexto, Luna in septimo. Et gentes habitantes in climate sequuntur naturam planetae dominantis. De hac materia superius dixi vobis, ideo replicare non intendo.
